معدات التسقيط المثاليه لصيد السمك من المركب

 العدّة المظبوطة سر رزقتك في البحر!

لو نازل بحر من غير عدة مظبوطة يبقى كأنك رايح حرب بإبرة خياطة!

في صيد التسقيط، العدّة بتفرق فرق السما من الأرض، وده جدول مبسط بالمعدات المثالية لصياد التسقيط في بحر الإسكندرية:

1. البوصة:

طولها من 2.4م لـ3.6م، حسب المركب وعدد الصيادين.

تكون قوية وخفيفة، تتحمل وزن الرصاص ف الغزيلة.
وتكون حساسه على الوعر عشان الدنيس 

2. المكنة (الماكينة):

سحب ناعم ودرج حساس.

مقاس 6000–8000 حسب العمق، وتكون ماركة محترمة.

3. الشعر:

مكنة: يفضل بريد مقاس 30–40 lb عشان تحس بأقل هزه من 60 متر.

والسبب: لأن خيط البريد غير مطاطي، فده بيخليك تحس بأصغر قرصة 

أو هزة من السمكة حتى على عمق كبير زي 60 متر،لو كنت بتستخدم خيط نايلون عادي، 

فده بيكون فيه نسبة مطّ، فبتضيع الإحساس بأي حركة صغيرة بتحصل تحت، خاصة لو العمق كبير.

 لكن البريد، بحكم إنه ناشف ومفيهوش مط، بينقل لك أي حركة أو هزة من تحت فورًا، 

وده بيفرق جدًا مع السمك الحساس زي الغزيلة أو الصرع.

سبحة: نايلون 40–50، أو بريد لو بتحب الحِس.

4. الرصاص:

حسب التيار، من 100 جم لحد 200 جم، ويفضل يكون طولي مش دائري

5. السبحة :

بين 3 إلى 6 أسلحة حسب عمق المكان ووجود التيارات.

لازم تكون مربوطة صح، والمدور جديد ولو مستعمل اتأكد انه تمام

6. السنار:

الكفته أو الملوي أكترهم شغل في بحرنا.

مقاسات من 6 لحد 1 حسب نوع السمك وحجم الطُعم.

نصيحة اخويا:

"ماتستهونش بحاجة، كل حاجة ليها دور.. السنار ممكن يحرمك من رزقك 

لو مش مناسب لنوع السمك الي تحتك !"

تكملة باقي المقال 

شرح مبسط لطريقة التسقيط خطوة بخطوة