افضل طريقة صيد سمك المياس بسهولة واسرع وقت

طريقة صيد سمك المياس

سمك المياس

موسم المياس

المياس موجود طول السنة ولكن بيبقى كتير في الربيع والصيف وفي الشتاء موجود بس قليل

اوقات صيد المياس

من العصر لغاية بعد غروب الشمس بساعة تقريبا

ومن قبل الفجر بساعة لغاية شروق الشمس

طرق صيد المياس

اللي اعرفهم من طرق صيد المياس طريقتين

الاولى
ودي بتكون من المراكب ومش اي صياد بيستخدمها لانها صعبة و الهواة اللي زي حالاتنا مش بيستمتعوا

 بيها لان الهدف منها بيكون كمية السمك مش مجرد الصيد للمتعة وهي غزل السنار

وده بيكون شعر نمرة 100 او 120 وطولة ممكن 200 او 250 متر وبيربطوا كل 2 او 3 متر سنارة

 كبيرة شوية في سلك مش شعر عادي وبين كل سنارة والتانية يحطوا رصاصة ويطعم في كل سنارة

 سردينة كاملة او نص سردينة ويفرد الشعر في المية ويسيبة من بالليل للصبح ويرجع يلمة وزي ما ربنا يرزق بقى

نيجي للطريقة التانية اللي كلنا ممكن نعملها

البوصة والماكينة

قبل ما نبتدي نصطاد مياس لازم نعرف ان المياس من الاسماك اللي بتاكل اسماك واللي شاف المياس 

قبل كده يعرف ان ليه اسنان حادة جدا يعني الشعر العادي ماينفعش معاه لانة ببساطة سنانة عاملة زي الموس

 فتخيلوا لو انت عديت بالموس على الشعر ايه اللي حيحصل ؟؟ علشان كده بنستخدم سلك صلب

وهو بيبقى عبارة عن سلك مجدول طولة حوالي 20 سم وملحوم فيه سنارة كبيرة بتكون 05 او 04 على حسب

 ما انت تختار
حتحتاج كمان بوصة تكون قوية جدا لان مقاومة المياس جامدة انا عن نفسي مش بصطاد المياس الا

ببوصة بامبو عاملها على ايدي من اول ما جيبتها خام وقطعتها وحمصتها لغاية ما بقت بوصة

يعتمد عليها وهي بوصة حتة واحده 5 متر

مش معنى كلامي ان البوص الفيبر ماينفعش  لا

الشعر اللي حنستخدمة هو الشعر العادي يعني 40 او 50 مش محتاجين شعر جامد لان

السمكة مش حتوصلة الرصاصة متوسطة الوزن

نيجي دلوقتي لاهم جزء في صيد المياس وهو الطعم

زي ما قلنا المياس بياكل سمك يبقى احنا لازم نصطاده باللي هو بياكلة ممكن تجيب سردين من السوق وتشتغل بيه

ولكن انا بفضل اني ارمي بسمكة من المية اللي حرمي فيها

بمعنى اني ممكن ارمي بمرمارة او شرغوش او موزة ومش حتصدقوا اني مرة رميت

بدنيس بس كان يستاهل وممكن انك تاخد البوصة العادية معاك وتطلعلك مرمارتين وتحطهم في جردل مية وتشتغ بيهم

 نيجي دلوقتي لطريقة التطعيم وفيه طريقتين

اما انك تعمل السمكة شرايح وتدككها في السنارة عادي جدا بس الطريقة دي مش بتخلي الطعم يعيش

 معاك كتير في المية لان صيد المياس زي ما قلنا محتاج صبر يعني ممكن ترمي وتقعد جنب

 البوصة ساعتين تلاتة لغاية ما حاجة تضرب

الطريقة التانية للتطعيم ودي المفضلة عندي وهي انك تصطاد بالسمكة كاملة

توكلنا على الله ورمينا

نصيحة لكل اللي عايز يصطاد مياس لازم تفتح وش الماكينة على الاخر علشان لو السمكة شدت ما تكسرش البوصه

المياس بياكل ويشد ودايما بيجري لجوه يعني لازم تديلة براح في الشعر وسيبه يجري براحتة حيتعب

 ويقف وزي ما قلنا انه مقاوم عنيد جدا بس لما بيتعب بيسلم فماتحاولش انك تتعافى عليه لاني للاسف

 بشوف ناس بترمي على المياس وفاكرين ان كل ما تكون السمكة قوية يبقى لازم انت تكون اقوى

اول ما تشدك المياسة افتح القلاب بتاع الماكينة وسيب الشعر حر على الاخر تاخد منه زي ما هي

 عايزة لغاية ما تقف بعد كده تقفل القلاب وترد في السمكة بكل قوتك لان فم المياس قوي جدا فالازم

تتاكد ان السنارة غرزت فيها وعيش واستمتع بمقاومة المياس الجميلة

نصيحة اخيرة

اسنان سمك المياس

خلوا بالكم لما تطلعوا المياس وانتو بتسلكوا السنارة لان لا قدر الله لو السمكة قفلت بقها على صباعك ممكن تقطعه


سمكة المياس تتغذى على الاسماك الصغيره مثل

( الموزه والبساريا والسردين والمغازل )(الكنايا الصغيره) وكذللك السبيط والكلماري .

مواسم تواجد الاسماك :

اسماك المياس متواجده طول العام ويطلق على هذه الاسماك ب المياس المستوطن ولكن هذه الاسماك تكثر وتتواجد باعداد 

واسراب كثيره ابتداء من شهر ٤ وحتى نهايه شهر ٩ وذللك لان هذه الاسماك تحب المياه الدافئه

 التي تزيد من نشاط السمكه والتي تكون ظروف مناسبه للتكاثر ايضا.

معظم هذه الاسماك تأتي مهاجره من ليبيا وبعض الصيادين في المكس والمنتزه بيطلقو عليها لقب ( المياس الاخضر ) .

هذه الاسماك كانت تتواجد في مارينا باعداد كبيره في السابق ولكن الخمس سنوات الاخيره اصبحت ضعيفه

 وذللك لكثره مراكب الصيد التي تقوم بغلق الحواجز بالشباك حتى في موسم توقف الصيد والذي يعتبر بدايه

 الموسم لهذه الاسماك وكذللك ردم بعض الحواجز التي كانت تتجمع عليها كما ان هذه الاسماك يسهل 

اصطيادها عن طريق مراكب الصيد (الشانشوله) والتي تقوم بمحاصره هذه الاسماك بالشباك

 حين رؤيتهاويساعد في ذللك صفاء المياه المتواجده في الساحل الشمالي .

احسن اوقات الصيد :

من قبل طلوع الفجر الى مابعد الشروق بساعتين ومن العصر الى المغرب .

الطعوم المستخدمة :

١- المغازل (الكنايا الصغيره) وهي من احب الطعوم لهذه الاسماك .

٢- البساريا والسردين .

٣جميع الاسماك التي تتوجد حول الاماكن الصخريه : الدنيس ،الشراغيش،الموزه،المرمار .

٤- السبيط والكلماري .

طريقه الصيد

صيد سمك المياس بالسنارة

١- التجريه :وهناك طريقتين للتجريه لصيد هذه الاسماك .

الطريقه الاولى (أ):

وهي الطريق التي يتبعها الصيادين في المكس والمنتزه وابوقير عن طريق المراكب الصغيره والتي تتيح لهم 

الاقتراب من المناطق الصخريه وذللك عن طريق تسليك المغازل في سبحه جر والدوران حول المناطق

 الصخريه للجزر المتواجده في عرض البحر بأستخدام سللك معدني (واير) وسلاح كبير و يصل سعر كيلو 

المغازل في هذه الفتره الى ١٠٠ ج وذللك لصعوبه الحصول عليها ،

ويفضل الصيادين استخدام المغازل الانثى والتي يكون لونها مائل الى اللون الاصفر عن المغازل الذكر التي يكون

 لونها مائل الى اللون الفضي لان الانثى في هذه الفتره بتكون مليانه وبتستحمل التجريه عن الذكر اللي

 بيكون ضعيف ولازم الصياد يغير الطعمايه كل شويه عشان بتتبهدل .

الطريقه الثانيه (ب) :

عن طريق الربلات على الحواجز والمناطق الصخريه ومن الطريف في هذا الموضوع انه في احدى الرحلات

 التي قومت بها مع احد الصيادين في المنتزه على جزيره جريشه انه كان يقوم بكسر الدفه المخصصه للرابله

 لان هذه الاسماك تهاجم الاسماك الموجوده على السطح كما انك تقوم برمي الرابله على الوعر مباشره وتلم

وعاده ما تكون هذه الاسماك متواجده تحت الوعر مباشره في انتظار خروج الاسماك الصغيره وتفاديا

 لعدم امساك الرابله بالصخور ، المغذى من هذه المفارقه انه هذا الصياد قام بتحليل طريقه هجوم هذه الاسماك 

وقام باجراء تعديل على صناع الرابلات في العالم من وجهه نظره

ومعايشته لهذه الاسماك لتتناسب مع البيئه التي يصطاد فيها .

٢- استخدام الطعوم ( الشرحه ) :

وهذه الطريقه شائعه الاستخدام بين الصيادين ونقوم باستخدام اسماك البوري في هذه الطريقه او الدنيس 

وذللك عن طريق اخذ الجانب الايمن والايسر من السمكه على طريقه الفيليه ومن ثم وضع الجانبين على

 بعض ويكون جانب اللحم للخارج و جانب الجلد والقشر للداخل ونقوم باستخدام واير وسلاح كبير

ونقوم بدكيك السمكه من الاعلى الى الاسفل خمس مرات على الاقل ثم نقوم بأحضار ١/٢ متر شعر ٣٠ 

ونقوم بلفه على الشرحه من الخارج وربطه جيدا عشان السمكه ماتتبهدلش وانتى بترمي وكمان عشان تقعد

 ماسكه نفسها فتره لانك بترميه وتسبها .

ممكن كمان تستخدم راس سبيط او سبيط صغير في هذه الطريقه .

٣- الطعم الصاحي :

ونتسخدم في هذه الطريقه اي نوع من الاسماك (دنيس فليكس ،شراغيش ،مغازل ،مرمار ) ونقوم بشك السمكه 

من الذيل باستخدام سلك معدني وسلاح كبير ولازم تفتح البيكب ولما السمكه تتضرب تقفل وترد جامد والسمك

 ده مش عايز تسيبه يجري كتير لانه بيشلح كتير لم على السمكه وتعافى عليها لانها لما بتشد عليها بطير 

وبتتطلع بره الميه فتتديك فرصه انك تلم شعر زياده .

نصائح وارشادات عند صيد المياس :

١-يجب استخدام بوصه قويه ناشفه عشان تعرف تتعامل مع السمكه لو كونت بتستخدم طريقه الشرحه

 او الطعم الصاحي اما لو كنت بتصطاد بطريقه التجريه ينصح باستخدام 

بوصه مرنه عشان تعرف ترمي الرابله مسافات بعيده .

٢-يجب التعامل مه هذه الاسماك بحذر عند اصطيادها وانصح باستخدام كماشه او بنز عند تسليك السمكه .

٣-المياس عاده ما بيكون اسراب وبيعمل دوريات على نفس المكان عشان كده لو اخدت سمكه

 الفجريه جرب عليه المغربيه او تاني يوم في نفس الوقت .

٤-الواير المستخدم في صيد الشرحه يجب الا يقل عن مقاس 40 .

٥- يفضل استخدام سلاح مقاس 04 او 05

٦- يجب شك السمكه من الذيل في طريقه الطعم الصاحي بعيدا عن العمود الفقري .

ارجو ان اكون قد استطعت افادت الجميع والى اللقاء في حلقه قادمه ان شاء الله
 

أجمل طرق صيد المياس (1)

صيد المياس بطريقة الكاستنج 🐠

النهاردة هنتكلم علي شغل المياس بطريقة الكاستنج

الأدوات والمعدات المطلوبه ........

اللور المخصصة لصيد سمك المياس

.
1/بوصة قوية خفيفة يستحسن كربون ومكنة حجم وسط قوية واملاها شعر 45 او بريدد 30 ليبرا

 واهوي البكرة بتاعة المكنة شوية

2/المكان المناسب للكاستنج عالمياس يكون علي حروف الوعر او علي اطراف الجزر وياريت

 في مكان يكون رغوة الموج فيه بيضا وكتير وتشوف مكان تقف فيه يكون امان

3/بعد كدة تبدأ تستعمل اي نوع رابلا من اللي في الصورة ولو حانستعمل رابلا فوق ال10سم يعني

 يبدأ وزنها مثلا من 28 جرام وحتي 60جرام يبقي حانربط الرابلا في الشعر علي طول

4/ولو حاستعمل رابلا صغيرة اصغر من 10 سم واقل من 28جرام او معلقة صغيرة يبقي حانحط

 رصاصة بلحة صغيرة 20 جرام مثلا ونسندها بمدوار ونربط شعراية بطول متر وفيها الرابلا في

المدوار وتكون نفس الشعر اللي عالمكنة يعني 45 برضو

5/ونبدأ نرمي في الرغوة ونلم بس مش بسرعة جامدة ﻻ مابين البينين ﻻ سريع وﻻ بطئ .. والله الموفق

عود قوي لصيد سمك المياس

 نرجو مشاركة المنشور لتتم الوصول لاكبر عدد من محبي صيد السمك حتي تفيد ويستفاد غيرك

للعلم والافاده 

بعض المواضيع والمقالات منقوله من مجموعات مختلفه سواء جروبات او صفحات فيس بوك 

وذلك لتعليم اكبر عدد من الاشخاص المهتمين بصيد السمك وتوفير جميع المعلومات له 

لاتنسي مشاركه الموضوع وترك تعليق اذا اعجبك ونشكركم علي متابعه القرأه

شارك الموضوع

إقرأ أيضًا